Baltuna

Mountain View inguruan ez dira geldirik egotekoak, horren lekuko dira Googlek azken aldian aurkeztu dituen produktu ezberdin guztiak. Hauetan azkena Google+ izan da, Facebook handiari kontra egiteko sortu duten sare soziala. Facebookek duen indarra ikusirik sortu den zalantzarik handiena Google garaiz dabilen edo nahiz eta sare sozial on bat egin mundu horretara beranduegi iritsi diren da. Pertsonalki eta interneten gauzak zein azkar eboluzionatzen duten ikusirik sekula ez dela beranduegi esango nuke, gauzak ondo eginda beti dago eta arrakastarako lekua, are eta gehiago Google bezalako enpresa batentzat.

Googlek azkenaldian aurkeztutako produktu handienekin huts egin zuela esan daiteke, gehiengoak ahaztuak baititu Google Wave (pertsonalki potentzial handia zuen produktua iruditzen zait) edo Google Buzz bezalako produktuak. Oraingoan asmatu ote dute? Hona hemen oraindik ere ezagutzen ez duzuenentzat Google+ pixka bat azaltzen duen sarrera:

Lehen inpresioa

Googlek egin ohi dituen produktu gehienak bezala sare sozial honen erabilera ere guztiz sinplea da. Facebooken antzeko egitura duenez erreza da bertatik datorren edonorentzat behar duena non egon daitekeen asmatzea. Horretaz gain interfaze garbi batek erakargarri egiten du aukera ezberdinen artean nabigatzea. Lehen inpresioa beraz guztiz positiboa da; erreza eta erakargarria.

Zirkuluak

Facebook edo antzerako sareekiko lehen ezberdintasuna ‘zirkuluak’ bezala bataiatu dutena da. Zirkuluak lagunak antolatzeko erabiltzen dira, nahiz eta lagunak kontzeptua beste sare sozialekiko ezberdina den. Hemen zirkulu ezberdinak sortu ditzakegu eta horietako bakoitzean nahi dugun lagun edo pertsona sartu ahal izango dugu. Antolatzeko era guztiz intuitibo eta erreza da, kontaktua aukeratu eta nahi dugun zirkulura arrastratzea besterik ez dugu egin behar. Ez da beharrezkoa beste pertsonak zu onartzea, honela Twiterren gertatzen den bezala edonork publikoki argitaratzen dituen mezuak irakurtzeko aukera izango dugu.(Bideoa)

Hangouts (Bideo-txata)

Hangouts taldekako bideo-txat bat bezala defini dezakegu, berau irekia (edonor sartu daiteke bertan), zirkulu batzuei mugatua edo pertsona batzuei mugatua sortu daiteke. Malgutasun honek jende ezberdinez osaturiko bideo-txat batetik, pertsona bakarrarekin hitz egiteko bideo-txat bat sortzeko aukera ematen du. Oraindik ere frogatu ez dudan arren irakurri ditudan iritziei erreparatuz pinta ona duela esan daiteke, batzuek Skype bera ere atzean uzteko potentziala duela aipatzen baitute. (Bideoa)

Pribatutasuna

Pribatutasunaren kontua nahiko gai sakona izaten da, are eta gehiago Google bezalako enpresa handi bat atzean dagoenean, baina pribatutasun kontzeptua beste kideekin elkarbanatzen dugunera mugatuz gero Google+ gustatzen zaidala esan beharra dut.
Aurretik aipatutako zirkuluek paper garrantzitsua jokatzen dute atal honetan, edozein argazki, mezu, datu… argitaratzeko garaian guk hautatzen dugu eta ze zirkulutako kideek ikusi ahalko duten. Honek edozein argazki, mezu… elkarbanatzeko garaian nork ikusi ahalko duen oso argi aukeratzeko gaitasuna emango digu, nahi izanez gero edonork ikusi ahal izatetik pertsona bakar batek ikusteko aukerara mugatuz.

+1

Orain hilabete batzuk aurkeztu zuten +1 aukerak garrantzi handiago hartzen du Google+ barruan. Facebooken ‘Atsegin dut’ bezala ezagutzen duguna da +1 sare sozial berri honetan. Kasu honetan gainera Googlen bilatzaileko emaitzetan eragina izan dezake botoitxo honek, zerbait bilatzen dugunean +1 click asko dituzten sarrerei garrantzi handiagoa emanaz.

Beranduegi?

Aurretik esan bezala ez dut uste beranduegi denik, Googlek ateratzen duen edozerk interes handia sortzen du eta honekin ez da kontrakoa gertatu. Zaila izango da Facebooki gailentzea baina orain artekoa ikusirik eta Googlek duen potentziala kontuan harturik gertutik jarraitu beharreko proiektua iruditzen zait.

PD: Edonork gonbidapen bat nahiko balu eskatu eta saiatuko naiz bidaltzen.

Polita da goizeko 5tan etxetik irten eta etxera itzultzen ari diren mozkorrak ikusi beharrean euskararen alde korrika egitera doan jendea ikustea, polita da herriko lehen kilometrotik azkeneraino ehundaka pertsona euskararen aldeko oihuak egiten ikustea, polita da herriko talde ezberdinen euskararen aldeko konpromezua ikustea, polita da bai, baina oraindik eta politagoa litzateke 5km-ko bidean ikusitakoa egunero herriko edozein bazterretan ikusi ahal izatea.

Badakit gaur goizean korrika ikusi ditudanek benetan egiten zutela korri euskararen alde, baina gustatuko litzaidake horiek guztiek gaur egin dutenari buruz hausnartzea eta hemendik aurrera inungo izerdirik suposatu ez dien ohitura bat hartu eta benetako euskalakari bihurtzea. Hori da dugun bide bakarra eta horretaz jabetu arte ezer gutxi dugu egiteko. Beraz;

Maitatu, ikasi, ari… izan EUSKALAKARI!

Denok espero genuen gobernu aldaketa ematen zen momentutik euskarak momentu gogorrak bizitzeko prestatu beharko zuela. Argi zegoen, batez ere, gobernua osatzen duen gehiengoa eta ia neurri berean hauei botoa ematen dien gehiengoak hizkuntza kontrolatzen ez duela kontuan hartuta.

Neurri asko eman dira euskara gutxiesteko, esate baterako, zenbait lan publikoetako euskara gaitasun maila jaitsi, euskara maila ziurtatzeko erabiltzen zen EGA titulua, aldaketa berri batzuk direla medio zakarrontzira bota, hizkuntz politika nuloa egin, euskarazko komunikabideen gainbehera bultzatu, euskararen aholulari bezala berau desagertarazteko aholkuak ematen dituen norbait sartu eta azken eguneton komunikabideetan azaldu den, baina berez guztiz berria ez den, euskara eta ETA-ren arteko lotura zuzena egin. Laburbilduz, beraien jarraitzaileak gustora izateko neurriak hartu, ez du beste misteorik.

Gobernuburuek trabak besterik jartzen ez dituzten momentu honetan, herritarrak gara horri aurre egin behar diogunak. Ez dira egun asko pasa euskarari buruzko azken estatistikak atera zirela eta komunikabide bakoitzak nahi dituen datuak hartu dituen bezala, nik ere berdina egiteko asmo dut. Bertako datu batekin geratu naiz; EAEko biztanleen %77-ak euskara ulertzen du. Ez dakit guztiz pozik egoteko datua den, hare gutxiago datu honek zazpi probintzietako hiru bakarrik kontuan hartzen dituela jakinda, baina geure buruetan txip aldaketa bat egiteko garaia badela uste dut ezta? Zenbatek egiten dute ulertuko ez zaien beldurrarekin lehen hitza gazteleraz? Datu horren arabera lau pertsonatik hiruk esandakoa ulertuko dizute, beraz, zergatik ez ditugu konplexu horiek atzean uzten eta geure lehen berba beti euskaraz egiten? Ulertzearen aukera oso altua da eta ulertzen ez badu agian zer pentsatu emango dio, hasieratik gazteleraz egiten badiogu planteatu ere egingo ez dituen pentsamenduak etorriko zaizkio burura, ezta?

Beste gai askotan bezala, herria da boterea duena, eta agintarien laguntzarik jasotzen ez badugu, herritarrok lehen baina gehiago eman beharko dugu. Ez da nahikoa agintarien lana kritikatzea okindegira sartu eta ‘Una barra de pan’ esaten jarraitzen badugu. Bakoitzak geure inguruan lan egiten badugu, Francisco eta bere lagunek bulegoetan hartzen dituzten erabakiek baina indar gehiago egin dezakegu. Beraz ez ahaztu datua, kalean topatuko duzun lau pertsonetik hiruk gure hizkuntza ulertzeko gaitasuna du eta geratzen den besteak non bizi den ikasi beharko du, ezta?

Beraz, hemendik aurrera kalera irtetean izan presente datu hori eta mintza zaitez euskaraz, gutako bakoitzak bere lana betetzen badu aurrerantz jarraituko dugu eta.

Interneten erabilera hain hedatua dagoen garai hauetan, ez da harritzekoa erabiltzaile berdinak, interneten nabigatzeko nabigatzaile bat baina gehiago izateak, edo nahiz eta nabigatzaile berbera erabili hauek ordenagailu ezberdinetan egotea. Honek sinkronizazio arazoak ekar ditzake, ordenagailu bateko laster marketan jasotako gogoko bideoa beste ordenagailu batetik ireki nahi izatean bertako laster marketan ez topatzea adibidez.

Egunero gauzak asmatzen diren, baina aldi berean dena asmatua dagoen informatikaren munduan honek badu aspalditik soluzioa, eta egia esan ez bakarra. Horietako bati buruz zenbait azalpen edo iritzi azalduko dizkizuet hurrengo lerroetan.

Pasa dira jada bi edo hiru urte nabigatzaileetako gehigarri moduan funtzionatzen duen Xmarks instalatu nuenetik. Garaia haietan Foxmarks zuen izena eta Mozilla Firefoxen bakarrik erabili zitekeen, baina nituen ordenagailu guztietan Firefox instalaturik nuenez ez zen arazo edo muga bat izan aukeratzeko orduan.

Xmarks, laburtzeko, gure laster marka zein pasahitzak nabigatzaile ezberdinetan sinkronizaturik mantentzeko balio duen gehigarria da. Oso era errezean funtzionatzen du, erabiltzaile bat sortzea eta gehigarria gure nabigatzailean instalatzea nahikoa da gure laster marka zein pasahitzak sinkronizaturik izateko.

Aukera asko eskaintzen ditu Xmarks-ek, ez ditut horietako denak ezagutzen edo erabiltzen. Pasahitzen sinkronizazioa adibidez ez dut oraindik frogatu, ez nahiz pasahitz guztiak nabigatzaile eta ordenagailu guztietan sinkronizaturik izatera hausartu.

Pertsonalki gehien gustatzen zaizkidan aukerak hurrengoak dira:

• Web bidezko sarrera: http://my.xmarks.com/ webgunean ere gordetzen ditu gure laster markak, egunen batean gehigarri hori instalatu gabe duen ordenagailu batean gure laster marketara sartzeko aukera izan dezagun.

• Perfil ezberdinak: Aukera hau oso baliagarria izan daiteke, ordenagailu bakoitzean guk aukerartutako laster markak bakarrik agertzeko. Pertsonalki laneko eta etxeko perfila ditut, lanean gordetzen ditudan zenbait esteka ez baititut etxean sekula erabiltzen eta baita alderantziz ere.

• Nabigatzaile ezberdinak: Orain ez hilabete asko sartu zuten aukera da azken hau. Aurrerapauso garrantzitsua dela iruditzen zait, gehigarria edozein nabigatzaileetan erabiltzeko aukerak ate asko irekitzen ditu eta.

Badaude Firefox Sync bezalako beste aukera batzuk, baina nahiz eta denbora aurrera doan bezala hobetzen ari diren, oraingoz motz geratzen zaizkit. Xmarksekin ohituta nagoenez ezin naiz web bidezko sarrera, perfil ezberdinak eta nabigatzaile ezberdinetan ibiltzeko aukera ez duen gehigarri batera itzuli.

Nahiz eta orain arte Wikipedian egin ditudan ekarpenak minimoak izan, askotan pentsatu izan dut guztion artean euskarazko Wikipediari bultzadatxo bat nola eman. Sekula ez dut formula egokirik topatu eta azkenean pentsatzen hasitako sasi-proiektu guztiak bazterrean utzi izan ditut. Eguneko aipuaren kasua ezberdina izan da.

Lanean lekuz aldatu ninduten eta leku berrian Argiako egutegi bat izateak proiektutxo bat hasteko ideia eman zidan. Zergaitik ez aprobetxatu atzeko aldean dituen aipuak egunero Tumblr + Twitter bidez zabaltzeko? Ideia, pentsatu gabe etorritakoa izanik eta aurrera eramateko oso sinplea, aurrera egitea erabaki nuen

Lehen aipua idatzi nuenean, bere egilearen Wikipediako orrira joan nintzen bere biografiaren esteka bat jartzeko asmotan baina ‘tamalez’ ez nuen ezer topatu. Tamalez komila artean jarri dut, hau izan zelako nire proiektutxoari plus bat gehitu eta Wikipediarekin uztartzeko ideia eman zidana. Zergaitik ez sortu eguneko aipuaren protagonistaren Wikipediako orria eta ondoren jarraitzaile guztien artean egunean zehar hori osatzen joan? Egunaren amaieran biografia txukuna izango genuke lan asko egin behar izan gabe eta urtearen amaieran 365 biografia txukun gehiago izango genituzke denok libreki erabili ahal izateko.

Proiektua lehen pausoak ematen ari da eta esan beharra dago Wikipedia editatzeak oraingoz ez duela izan arrakasta handiegirik, baina beno, bide guztiak pausoz pauso egiten direnez lehen pauso hauek ere garrantzitsuak dira aurrerago arrakasta handiagoa lortu eta benetako helburua lortuz biografia txukun horiek izateko.

Ideia interesgarria iruditu bazaizu badakizu, jarraitu Eguneko aipua Tumblr eta Twitter bidez.
Wikipedia editatu nahi ez izanda ere egunero aipu bat izango duzu irakurtzeko, eta animatzen bazara Wikipediari ekarpena ere egin diezaiokezu.

Animatu eta parte hartu!

Orain gutxi bertsio berria atera dutela aprobetxatuz, Spotify-k zenbait aldaketa garrantzitsu egin ditu bere reproduktorean. Aldaketa horien artean batez ere bi nabarmendu nahiko nituzke, batetik sare sozialekin konektatzeko aukera eta bestetik disko gogorrean ditugun abestiak Spotify barruan entzuteko aukera.

Lehenak gauza interesgarriak dakartza, adibidez gure Facebookeko lagunekin ze musika entzuten dugun elkarbanatu baitezakegu. Aukera ona ikusten dut, besteek ze entzuten duten ikusita musika berria ezagutzeko aukera dago eta, baina baditu bere alde negatiboak ere, gure ezagunek ze musika entzuten dugun ikus dezakete eta, nahiz eta entzuten ari garen diskoa elkarbanatu edo ez elkarbanatzeko aukera dagoen. Ez konpartitzearena aukera ona izan daiteke bestela ezingo dugu berriro ere tabernan… “Nik hau tabernetan entzuteaz ezagutzen dut, etxean ez nuke inoiz entzungo” eta antzerako esaldirik esan, jeje. Honetaz gain badago gure Twitter edo Facebook perfilean momentu horretan ze musika entzuten ari garen elkarbanatzeko aukera ere, momenturo zer egiten dabilen elkarbanatzea gustatzen zaien horientzat pentsatua.

Bigarren aldaketa nagusia gure disko gogorrean ditugun abestiak Spotify barruan entzuteko aukera da. Pertsonalki asko gustatzen zaidan aldaketa da, disko gogorrean Spotifyn aurkitu ezin dudan musika dezente dut, gehienbat euskalduna, eta hauek entzuteko beste reproduktore bat ireki behar ez izatea oso ondo etorri zait. Reproduktore perfektua izateko zenbait gauza falta zaizkio oraindik baina bide onetik doa. Ea noizko

Norbaitek oraindik Spotify ezagutzen ez badu probatzera gonbidatuko nioke, ezin hobeto esan gainera, 10 gonbidapen ditut eta banatzeko. Gonbidapen bat nahi duenak idatzi dezala komentario bat bera email helbidearekin edo jarri dadila kontaktuak nirekin eskubiko estekak erabiliaz.

Orain hilabete batzuk Sustatun irakurritako albiste baten harira ezagutu nuen Azpitituluak euskaraz webgunea. Besteak beste euskarazko azpitituluak sortzeaz arduratzen den webgunea da, edo hobeto esanda, jendeak sortzen dituen euskarazko azpitituluak pilatzeaz.

Hasieratik interesgarria irudi zitzaidan egitasmo da hau. Gaur egun, jendeak film zein serieak estreinatu bezain laster ikusi nahi izaten ditu, baina eduki horiek gehienetan hizkuntza harrotzetan heltzen zaizkigu. Gure hizkuntzan ikusi ahal izateko hilabeteak edo urteak itxaron behar izaten ditugu. Askotan gainera gure hizkuntzan ikusteko aukera galdutzat ematen dugu eta gure beste hizkuntzan ikustera jotzen dugu.

Zenbat aldiz ikusi behar izan dugu gure serie edo film gogokoena gazteleraz azpititulatua? Zergatik jotzen dugu azpititulu horiek gazteleraz eskuratzera?

Azken galdera hori irakurri duen edonork pentsatuko zuen ‘A ze galdera bota digun, gaztelerako azpitituluak jada sortuak egoten direlako eta lortzea oso erraza delako‘. Erantzuna logikoa da, baina euskaldunak izatez hain inkorfosmistak garela kontuan hartuta, nola konformatzen gara gogoko serie zein filmetako azpitituluak gurea den hizkuntzan irakurri beharrean gure beste hizkuntzan irakurrita? Argi dago azpititulu horiek ez ditugula gazteleraz bezain azkar sortu edo lortuko, baina zergatik ez egin hortara gerturatzeko apostua?

Agian hainbeste espero dugun azken kapitulua ikusteko itxaron ezin badugu gazteleraz azpititulatua ikus beharko dugu, baina zergatik ez ditugu sortzen eduki horiek pazientzia gehiago duen euskaldun jendearentzat? Jendeak geroz eta gehiago baloratzen ditu bertsio originalak, eta oraindik ere askok ingelesarekin ditugun arazoengatik azpitituluak behar izaten ditugu. Hauek euskaraz sortzen baditugu ez dugu tarteko hizkuntzarik behar, bertsio originalean entzun eta gure hizkuntzan irakurtzeko gai izango gara eta.

Hau guztiagatik seriezale euskalzaleei denon artean esfortzu hau egitera gonbidatu nahi zaituztet. Horretarako aukeratu euskaraz ‘ikusi’ nahiko zenukeen serie edo film bat eta hasi lanean. Ondoren denok eduki horiek eskura izateko igo Azpitituluak euskaraz webgunera. Horretaz gain batu zaitez Zutagun sortutako azpititulu itzulpen taldera, denon artean errazagoa izango da eta.

Animatu, lan handi baina polita dugu aurrean eta!

PD: Azpitituluen webgune horretan besteak beste nire lehen ekarpena jaitsi dezakezue, Lost telesailaren azken denboraldiko lehen bi kapituluen azpitituluak.

Jaitsi

Oraindik ere gogoan ditut Egunkaria itxi zeneko hurrengo egunak. Ez zen guztiz berria guretzat, urte batzuk lehenago zentsuraren garrak “Egingo dugu” esatera behartu baiginduen. Aurrekoan egin genuen eta ordukoan Donostiko kaleetan zehar “Egunkaria aurrera” ohiukatzea tokatzen zen. Jende pila batu zen Donostiako kaleetan, sekula Euskal Herrian ikusi dudan manifestaziorik handiena izan zen hura, mota guztitako jendea elkartu zen orduko agintariei gu ixiltzea lortuko ez zutela argi eta garbi uzteko asmoarekin.

Pasa dira ia zazpi urte Guardia Zibilak Egunkaria itxi zuenetik, tartean gure kultura zen herriaren aurkako beste zenbait eraso bizi behar izan ditugu, denek izan dute herriaren erantzuna, batzuk besteak baina ozenago entzun dira baina horrek ez du esan nahi gutxiago entzun direnak eraso txikiagoak izan direnik. Euskal Herriak askotan erakutsi du herri bezela jokatuta indar asko duela, epaiketa honen harira izan diren ekitaldiak adibidez ez dira  eskasak izan, denok sentitzen baigenuen Egunkaria gure zati bezala.

Ez da hilabete pasa beste injustizia bategatik Madrilen, audientzia nazionalaren aurrean, lagun min bati eta beste zenbait gazte ameslariri nolabaiteko babesa eskaini nahiean eguna pasa nuenetik. Hau izan zen audientzia nazionalaren jokatzeko era lehen pertsonan ikusi nuen lehen aldia. Nola eramaten duten inkomunikazioaren krudeltasuna azken mugaraino, nola jolasten duten pertsonen etorkizunekin, … Horregatik ez dakit zer pentsatu edo ze esperantza izan gaurko epaiketarekin.

Sekula existitu behar ez zuen audientzia honetan hartzen diren erabakiak, belodromoko saioan bertsolari batek baina gehiagok esan zuen bezala, lehendik hartuak daude. Gaurkoa ere ez da izango antzerki hutsa baina ezer gehiago. Ez dakit ze erabaki hartu duten jada goikoek Egunkaria auziaren inguruan, ez da erabaki erraza. Batetik libre utziz gero gure herriak lehen epaiketa politikoa irabaziko du eta honek beste batzuei ateak ireki diezaizkioke, bestetik herri oso bat atzean duen egunkari bateko kideak kartzelan sartzea ez da batere propoganda ona Euskal Herriari begira, baina beno badakigu betikolez nahi dutena egiten amaituko dutela, herriaren nahia, edo gehiago esanda, justizia haintzat hartu gabe.

Gaur audientzian daudenen alde nagoela ahaztu gabe, ezin dut hala ere euskal gizarteari kritika kostruktibo bat egin gabe amaitu. Argi dago gaur epailearen aurrean daudenek ez luketela azken urteetan pasa duten kalbarioa pasa beharko, baina hori bezain argi dago ez direla Euskal Herrian arrazoirik gabe atxilotu dituzten lehenak ezta azkenak ere. Beraz hemendik aurrera etorriko diren atxiloketa injustuak orain erantzuten gabiltzan indarrarekin erantzuten ikusi nahi zaituztet, ea herriak duen indarra aprobetxatuz Madril aldean konturatzen diren gurekin jolastearena amaitu zaiela.

Gaurkoan BEC-en Egañak botatako hitz batzuk ekarriko ditut auzipetuei nire babesa eskaintzeko.

“Injustizia luze doa ta, juezak entera bitez, askatasuna eskatzen dula herri batek aho batez”

Azken bolada honetan asko hitzegin da Googlek olatu bezala batailatu duen produktu berriaz. Oraindik ez dut izan denborarik patxadaz honek eskaintzen dituen aukera guztiak aztertzeko, baina badirudi ez direla gutxi izango eta behin jendea erabiltzen eta frogak egiten hasten denean hasiko garela zukua ateratzen produktuari, baina beno ez dut bloga horri buruz hitzegiten estreinatu nahi, atzo BEC-ek ikusi genuen olatuak merezimendu gehiago egin ditu gaurkoan hemen izateko. Ziur ez dela Googlerena bezain ezaguna egingo, ziur ez duela hainbeste diru emango, baina ziur ere, atzo BEC-n izateko ‘inbitazioa’ lortu genuenok ez dugula sekula ahaztuko.

Ez naiz bertsolaritzan aditua, are gehiago, ez naiz aukera duen bakoitzean bertsoak entzutera joaten den horietakoa ere, baina artista hauek entzuteko aukera dudanetan gozatzen duenetakoa naiz. Agian dosi txikitan entzuten dudalako iruditzen zait saio bakoitza bikaina, agian saio bakoitza bikaina  iruditzen zaidalako joan beharko nuke gehiagotara, ez dakit zein den formula, baina txapelketa honetan zehar eta batezere atzo BEC-n pasatako momentuek gure kulturako altxorretako bat gehiago apreziatzera narama.

Jende asko bildu zen Barakaldon, baina kopurua baina garrantzitsuagoa zen bakoitzak etxetik ekarritako gogoa, goizeko lehen momentutik ikusten baitzen han geundenok bertsolariek bertso bakoitzean eskaintzen zizkiguten altxortxoak txalo, olatu edo animo ohiuz erantzuteko gogoa genuela.  Hasierako agurrean ohartarazi zuen Sustraik Egaña, faboritoa izanez gero ez litzatekela batere lasai egongo atzokoan, eta Sustraik egindako pronostikoa saioa aurrera zioan bezala argitzen joan zen. Gaur egun Amets eta Maialen beste maila batean daudela uste dut, agian gai onak tokatu zitzaizkielako, agian edozein gai on egiteko gai direlako, baina eguerdi parterako argi-xamar nuen zeintzuk izango ziren buruz-burukoan. Bi hauek beste maila batean daudela esan dut baina horrek ez du esan nahi beste 6rak oso azpitik daudenik, debutantea zen eta zortzigarren izaten amaitu zuen Sarriegik ere aipatzeko modulo zenbait bertso bota zituen eta. Goizeko saioari agurra emateko aukera izan zuen beasaindarrak, bere lagunek eman zioten aukera aprobetxatu eta modu politean bidali gintuen bazkaltzera.

Goizekoan jendea gogotsu baldin bazegoen zer esanik ez arratsaldeko saioaz. Goizeko gartzelako saioko zenbait bertsok hunkitzea lortu bazuten edo bestalde Andoniren amaren babarrunek barre egiteko balio izan bazuten arratsaldekoan ere ez ziren falta izan hospitaleko bi kantzerduk umeak edo Unai eta Jonen gainean zebiltzan putreei buruzko bertsoak ere. Inork oraindik ere zalantzarik baldin bazuen bi ume haien indarrak Maialen zuzen zuzenean finalera eraman zuten. Bere laguna Amets izango zela ere ez dut uste inork zalantzan jartzen zuenik, autobuseko saioa hastea kosta bazitzaion ere, bota zituen bertsoek azkar asko ahaztarazi zizkiguten handienek ere egin izan dituzten akats horietako bat. Jendearen txaloetan ikus zitekeen Amets saio borobila egiten ari zela. Badakigu jendeak ez duela punturik ematen, baina normalean ez da ezberdintasun handirik egoten jendearen erantzun eta epaileen puntuazioen artean.

Alfabetikoki Amets eta Maialen edo puntuazioz Maialen eta Amets izan ziren atzoko buruz buruko protagonistak. Maialenen begiraden arteko suak, eta biek laguna bixitatu nahi eta ezinak amaitu zuen saio puntuagarria. Nik behintzat ez nuen argi nor izango zen txapelduna, norbaitegatik apostu egin behar izanez gero agian Ametsengatik egingo nuke apostu, baina beno Maialenengatik egin behar banuen ere arazorik ez. Ordurarte saioak momentu hunkigarriak izan bazituen hemendik aurrera hasi zen emozio festa. 2009-ko Bertsolari Txapelketa Nagusiko Txapelduna… Maialen Lujanbio!  Orduan hasi ziren besarkadak, Amets, Andoni, Aitor… Momentu politak bizi izan ziren hemendik aurrera, bertsolarien agurrak, Martxelok jaso zituen bi txalo zaparradak, Andoniren AGURRA, eta arratsaldeko momenturik politenetako bat. Joxe Agirrek Maialeni txapela jarri eta ondoren bota zituen bertsoak, bazirudien Joxe oso gustora zegoela atzoko ‘plazan’ eta guk ere ederki gozatu genuen bertsolari handi honekin.

Iritsi zen atzoko ekitaldiari amaiera emateko momentua, eskuak jada gorri genituen guztiok egindako txalo pilarekin, baina oraindik ere Maialenen azken bertsoa falta zen. Bertso polita bota zuen, baina amaiera izan zen pertsonalki gehien gustatu zitzaidana. Blog honetan idatziko dudan lehen sarrera amaitzeko, Maialenek irabazi duen lehen txapelketa amaitzeko erabili zituen hitz berdinak erabili nahi ditut.

“Herri hau sortzen segi dezagun, euskaratik ta euskaraz!”